Latest News

27‏/06‏/2008

اللهو الخفى




هو انا معقد ؟؟

سؤال سالته لنفسى بعد ما ودعت احد اصدقائى وانطلق كل منا فى طريق عوده للمنزل

معقول انا غلط

ولا مفيش حد فيهم عارف يفهمنى

ليه بحس دايما انى قدام الناس بعمل mask لجزء من شخصيتى

وللاسف مش بخفى جزء وحش

ده انا حاسس انه جزء حلو جوايا

لكن بحس انى مش دايما بظهر بكامل شخصيتى قدام اغلب الناس

وده بيحسسنى انى مقتبس شخصية تانية لان فى جزء ناقص من الشخصية الحقيقية



ليه حاسس ان محدش من اللى حواليا فاهمنى

رغم كل الناس اللى اعرفهم واللى اقدر اقول على نفسى انى شخص الى حد ما مش انطوائى وعلى درجة مش وحشة من الاجتماعية

لكن دايما حاسس ان محدش فاهمنى ولا اى مخلوق يعرف اى حاجة عنى

ولا عن تفكيرى

ولا عن اللى جوايا

سواء اهل او اصحاب او زملاء


دايما عمرى ما فكرت اكلم حد من اللى اعرفه عن دماغى او تفكيرى

لانى واثق ان محدش فيهم هيفهم الكلام ده

ده مش غرور منى

لكن احساس فعلا ان كتير منهم عقلهم وطموحهم وطريقة تفكيرهم اقل من اللى المفروض نبقى كلنا علينا

حاسس انى عايش فى مجتمع منغلق جدا

وان ده مش مكانى


وليه بحس انى شخصيتى كاملة بتظهر وانا قاعد قدام الكمبيوتر اللعين اللى انا قاعد قدامه ده

وليه دايما لما بلاقى حد فاهمنى بيكون لازم موجود حواجز زمنية او مكانية او اجتماعيه بينى وبينه

واحيانا حواجز عمرية

لان كتير جدا من اصحابى اللى عرفتهم واللى اقدر اقول عليهم اصحاب بجد يقدروا يفهمونى وافهمهم

دايما اكبر منى مش اقل من تلت سنين


للاسف لحد دلوقتى مقبلتش غير شخص واحد تقريبا احنا الاتنين متشابهين فى طريقتنا وفى تفكيرنا

وللاسف لحد دلوقتى مقابلتش اصحاب كتير تقدر تحس انهم فعلا مش محبطين

وللاسف بحس ان اغلب اصحابى اللى من سنى

مفيش فى دماغهم حاجة

خالص

نهائى

مذاكرة وبلاى استاشن

محدش فيهم بيفكر لحظة واحدة لقدام


وده مدينى احساس انى موجود فى مكان مش مكانى

ومدينى احساس ان اللى بيحصل عملية قتل بطىء لحاجة جوايا مش عارف اطلعها

ويا ترى فى يوم من الايام هحس فعلا انى مش مسجون جوا نفسى ؟؟

يا ترى هلحق نفسى قبل ما اموت

هل انا واخد فى نفسى ثقة زيادة عن اللزوم باحساسى انى اقدر احقق مستقبلى اللى انا راسمه ؟؟؟


هل انا اللى غلط

ولا هما اللى غلط ؟؟

بس انا عندى ثقة معرفش جايبها منين ان اكيد مش انا

يمكن انا مش قادر افهمهم على قد عقلهم

بس انا برضو مش لاقى حد فيهم يساير تفكيرى

وانا مش عارف افكر على طريقتهم


ومش هعرف


يا ترى هستنى لحد امتى لحد ما الاقى اللى الانسان اللى بدور عليه جوايا

؟؟

يا ترى هبقى فى يوم من الانسان زى ما انا شايف نفسى؟؟

مع العلم ان كل ما الوقت بيمر كل ما بقتل نفسى

i hope

OmaR Vs SaLma

سيناريو فاشل
اخراج افشل
قصة رائعة
قمة الواقعيه لاغلب قصص الحب اللى بتحصل حاليا
الفيلم ما هو الا اسكتشات ملهاش علاقة تقريبا ببعض
تعتمد فى اغلبها على الكوميدية المبتذلة
لكن احى تامر على رسمه للخطوط العريضة للقصة بهذه الواقعية التى لربما انشغل اغلبنا بايفهات واسكتشات المخرج عنها


اغلب قصص الحب فى اغلبنا ماشية على النحو التالى ::
حب اول
بندى له كل ما نملك
نظن اننا ملكنا الدنيا
بنغير كل حاجة فى حياتنا
علشان نبقى عاملين زى المفتاح اللى عاوز يشكل نفسه علشان يلائم القفل
وطبعا ده بينتهى بالفشل
وده يمكن من اكبر اسباب فشل الجواز اللى عن حب
اننا بننجرف ورا رغبات قلبنا باسم الحب
وبننسى ان لازم يبقى فى توافق عقلى بين الطرفين
علشان كده غالبا ما يفشل الحب الاول

وده اللى حصل مع تامر
قصدى عمر
وفرح
حب اول
انجرفوا ورا مشاعرهم
وقعوا فى الحب
من غير ما يسالوا نفسهم
هل الاتنين شخصيات ملائمة ومتوافقة مع بعض
يعنى هل دماغهم واحدة
هل طريقة تفكيرهم ممتزجة مع بعض
ولا immiscble ؟؟؟

ومع اول ضوء يبان فيه اختلاف توجهات وعقليات كل واحد فيهم
وعدم قابلية المزج بين الافكار
بيحصل تنافر زى المغناطيس
وفى نفس الوقت
القلب بيشد
لكن لازم يكون قوة التنافر اكبر

ويبدا القلب يعذب في الانسان بعد الانفصال
لكن بعد كده
يبدا يشوف الانسان اللى مكنش شايفه فى الطرف التانى
سواء الحلو او الوحش
ويمكن يعرف ان من حظه انه سابه
بعد ما كان فى الاول هيموت عليه بعد ما سابه

وده اللى بيحصل دايما والفيلم بينه
حب اول
يتفركش
نتعذب بعده
او واحنا بنحب نفتكر ان الحب ده بعده هتبقى الحياة ضياع
ولكن
الحياة بتستمر بعد كده
وبنشوف قد ايه احنا كنا هبل
وان الحب ده بقى ذكرى فقط
ومبقاش فى القلب منه اى حاجة خالص
وبنقابل حد تانى احسن
وبنتعلم من الاولانى كتير
وبنعرف اخطائنا
وبنحاول نتجنبها
ونحاول نختار المرة دى صح

ده واقع اغلب قصص الحب حاليا
مشكلة بيواجها اغلب اللى بيفشل فى حب الاول
ومبيعرفش يفهم اللعبة ماشية ازاى